Chalo choro Muhabat jhot hay, Best Poetry by Mohsin Naqvi ,

Chalo choro Muhabat jhot hay, Best Poetry

, چلو چھوڑو محبت جھوٹ ہے,by Mohsin Naqvi

چلو چھوڑو

چلو چھوڑو محبت جھوٹ ہے

عہدِ وفا اِک شَغل ہے بے کار لوگوں کا

 طلب سوکھے ہوئے پتوں کا بے رونق جزیرہ ہے  

خلش دیمک زدہ اوراق پر بوسیدہ سطروں کا ذخیرہ ہے

ہمارے وصل تپتی دھوپ کے سینے پہ اڑتے بادلوں کی رایگان بخش

 صحرا میں سَرابوں سے اَٹے موسم کا خمیازہ

چلو چھوڑو  چلو چھوڑو کہ اب تک میں اندھیروں کی دھمک میں سانس کی ضربوں پہ چاہت کی بنا رکھ کر سفر کرتا رہا ہوں گا

مجھے احساس ہی کب تھا کہ تم بھی موسموں کے ساتھ اپنے پیرہن کے رنگ بدلو گے

 چلو چھوڑو چلو چھوڑو وہ سارے خواب کچّی بھُر بھُری مٹی کے بے قیمت گھروندے تھے

وہ سارے ذائقے میری زباں پر زخم بن کر جم گئے ہوں گے

 تمہاری انگلیوں کی نرم پوریں پتھروں پر نام لکھتی تھیں میرا لیکن

 تمہاری انگلیاں تو عادتاً یہ جُرم کرتی تھیں

 چلو چھوڑو

چلو چھوڑو سفر میں اجنبی لوگوں سے ایسے حادثے سرزد ہوا کرتے ہیں صدیوں سے

چلو چھوڑو

چلو چھوڑو میرا ہونا نہ ہونا ایک برابر ہے تم اپنے خال و خد کو آئینے میں پھر نکھرنے دو

 تم اپنی آنکھ کی بستی میں پھر سے اِک نیا موسم اُترنے دو

میرے خوابوں کو مرنے دو

پھر نئی تصویر دیکھو

پھر نیا مکتوب لکھو

 پھر نئے موسم نئے لفظوں سے اپنا سلسلہ جوڑو

 میری ماضی کی چاہت رائیگاں سمجھو

چلو چھوڑو

 محبت جھوٹ ہے

عہدِ وفا اِک شَغل ہے بے کار لوگوں کا